A Deputación de Lugo traballa desde este luns para facer fronte a un episodio de neve e xeo rexistrado en diferentes puntos da provincia, nos que se acumularon nas estradas provinciais entre cinco e oito centímetros de neve.

Segundo indicou a Deputación nun comunicado, os concellos máis afectados por este episodio son Folgoso do Courel, Samos, Pedrafita do Cebreiro e Cervantes, onde os servizos provinciais actúan de maneira intensa.

Desta forma, os traballos céntranse na limpeza das estradas provinciais e na aplicación de sal, co obxectivo de que na xornada do martes non se rexistren problemas de circulación e que o transporte escolar poida circular con normalidade. Actualmente, non hai ningunha estrada cortada, pero a institución provincial pide responsabilidade á cidadanía e que se realicen unicamente os desprazamentos necesarios, extremando as precaucións.