A Xunta recibiu 11 ofertas de empresas para executar o último tramo da autovía que unirá Lugo e Sarria, a AG-22, cun investimento de 37,7 millóns de euros. Segundo detallou o Executivo galego nun comunicado, son as obras do segundo e último tramo da autovía, correspondente ao desdobramento do tramo Nadela-A Pobra de San Xiao.
Desta forma, os traballos contarán cun prazo de execución de 36 meses e a previsión é poder iniciar as obras este mesmo ano. A intervención permitirá actuar nun tramo de 13,5 quilómetros, que se inicia na glorieta de Nadela e finaliza na ligazón da Pobra de San Xiao, xa en servizo. Entre as intervencións previstas atópanse as ligazóns do Corgo e Maceda, un cruzamento de vía baixo a autovía A-54, a execución de dous viadutos no río Chamoso e no de Neira ou a ampliación de 13 pasos superiores e sete inferiores.
