A Comisión Xestora do PSdeG-PSOE na provincia de Lugo, constituída o pasado luns tras a resolución da Executiva Federal, celebrou este martes a súa primeira reunión de traballo. O encontro tivo como obxectivo definir as liñas de actuación desta nova etapa, na que a estabilidade institucional e a continuidade dos proxectos políticos foron os eixes centrais do acordo.

Durante a xuntanza, presidida por Luis Ángel Lago Lage, os membros da xestora fixaron como prioridade dar resposta á situación xerada nas distintas institucións tras o cese producido no partido e na Deputación de Lugo. O organismo subliñou que actuará dentro dos prazos legais para garantir a continuidade dos gobernos progresistas na provincia e recuperar a normalidade orgánica tanto nas agrupacións locais como nos concellos.

Outro dos asuntos estratéxicos abordados foi o horizonte das eleccións municipais de 2027. A Xestora destacou a importancia de comezar a traballar na construción de proxectos sólidos e candidaturas capaces de conectar coa realidade social de cada municipio. Así mesmo, realizouse unha análise das principais preocupacións da cidadanía lucense, con especial atención ao Servizo de Axuda no Fogar (SAF), o estado das comunicacións e a xestión forestal.

Finalmente, a Comisión Xestora tamén incluíu na súa folla de ruta o obxectivo de dar un peche definitivo ao debate arredor do proxecto de Altri. Con estas medidas, a nova dirección provisional busca reforzar a coordinación interna e consolidar a presenza do partido en todo o territorio provincial tras a crise aberta na institución provincial.