Estes días, Lugo presume en FITUR do contacto entre cidade e natureza, entre outros elementos de interese. O certo é que resulta complexo estabelecer os límites entre o casco urbano e os núcleos rurais, e así o demostra a presenza constante de fauna silvestre nas estradas e polas rúas da urbe. Especial é o caso dos xabarís, coma o que protagonizou un accidente esta mesma semana no Alto da Vaqueriza.
Por mor da época do ano, e especialmente tralas medidas de presión contra o hábitat do porco bravo –entre outras, o cerco e limpeza das goridas na contorna urbana–, cómpre entender o comportamento deste animal. Con tal fin, A Plataforma pola Convivencia Ética coa Fauna Silvestre sinala unha serie de patróns a seguir en caso dun encontro con xabarís.
Comportamento
Os xabarís adoitan ser vistos pola noite, cando se reduce a actividade humana. Durante o outono e o inverno, cando os días son máis curtos, aumenta a probabilidade de atoparse cos xabarís, o que engadido ás condicións da estrada –visibilidade reducida, humidade– deriva en máis accidentes. Por iso, debe procederse con cautela nas estradas, sobre todo entre xoves e domingo, os días de caza.
Outro factor a ter en conta é que é habitual que se despracen en grupo, polo que o paso dun exemplar pode preceder a outros xabarís. En calquera caso, é importante non empregar o claxon nin as luces, porque poden ocasionar un comportamento errático, unha molestia evidente para o animal, e quizais novos incidentes. De ter colisionado, é mellor deixar o animal ferido ata a chegada de axuda.
Diferente é a perspectiva en caso de moverse a pé e atopar un ou varios porcos bravos. Coma animais salvaxes que son, o mellor é deixalos cos seus asuntos, sen interferir na actividade de seu. É mellor respectalos, prescindir de acosos innecesarios e evitar molestias coma os flashes da cámara. Os xabarís son esquivos, e calquera ruído forte ou movemento brusco pode escorrentalos e levar a outros encontros indesexados nas estradas.
O que é preciso evitar é a proximidade a unha femia con crías, pois o comportamento instintivo é o da defensa das crías. A compañía de cans pode ser potencialmente perigosa, e non queda outra que levalos atados e o máis lonxe posible dos xabarís.
Así e todo, calquera porco bravo pode conlevar risco en certos contextos, singularmente en estradas, polo volume dos adultos. Por iso, o deber de todo cidadá é contactar cos servizos de emerxencia (112), e preguntar á administración local polos protocolos a seguir.
Os xabarís son coñecidos polos ataques aos cultivos, e teñen unha alimentación ben variada. Por este motivo, desaconséllase entregarlles ou deixar comida ao alcance do animal. A dependencia do alimento de orixe humano é unha das razóns da presenza na contorna urbana.
