A Garda Civil culminou un dispositivo especial de vixilancia imputando en calidade de investigados a dous condutores por presuntos delitos de exceso de velocidade á altura do termo municipal de Outeiro de Rei (Lugo).
Segundo explican nun comunicado, o grupo de investigación e análise de tráfico detectou, mediante o rastrexo xornal de redes sociais, a posible celebración, durante a madrugada do pasado día 22 de novembro, dunha reunión de afeccionados ao mundo do motor nas proximidades da saída 507 da autovía A-6. Ante a sospeita de que puidesen realizarse as denominadas “lanzadas” (competicións de velocidade ilegais) en vías públicas, estableceuse un dispositivo de vixilancia e control na zona.
O dispositivo deu como resultado a identificación de dous turismos circulando a 218 km/h e 213 km/h na autovía A-6 en Outeiro de Rei, sendo interceptados nas inmediacións a entrada do Polígono Industrial de O Ceao. Os infractores foron citados para comparecer ante o Xulgado de Instrución de Garda de Lugo para Xuízo Rápido.
Indican ademais que no marco desta investigación formuláronse varios boletíns de denuncia por infraccións administrativas graves relacionadas coa seguridade viaria e a orde pública na estrada. Concretamente, tres denuncias por establecer ou participar en competicións de velocidade en vías abertas á circulación, dúas denuncias por exceso de velocidade (168 km/h e 144 km/h) e unha por levar instaladas luces antirreglamentarias no vehículo (azuis e vermellas intermitentes simulando a iluminación dun vehículo policial).O operativo contou coa participación de diferentes unidades da Garda Civil nesta provincia, reafirmando o compromiso coa vixilancia das vías para garantir a seguridade de todos os usuarios.
