O tenente de alcalde de Lugo, Rubén Arroxo, cuestionou o criterio da Xunta nos investimentos en municipios e reclamou ao Goberno galego que aposte igual por todos os concellos. Así se manifestou o nacionalista despois de que este martes a alcaldesa de Santiago, tamén do BNG, denunciase nunha carta aberta aos veciños o uso “partidista” da administración autonómica. Fíxoo tras acordar o luns o Consello da Xunta unha colaboración de 12 millóns de euros co Concello de Ferrol, e que chegará aos 185 millóns en diversas actuacións na comarca, para a rehabilitación de edificios e a reurbanización.
Este mércores, Rubén Arroxo puxo como exemplo o barrio lucense da Tinería, onde, apuntou, “a maioría do patrimonio é responsabilidade precisamente da propia Xunta e leva 16 anos abandonado”. Nesta liña, o tenente de alcalde cuestionou a postura do PP que, tal e como apuntou, anunciou un concurso de ideas para o Pazo de Dona Urraca “que xa se realizou no ano 2008 e que a Xunta decidiu non executar”.
Do mesmo xeito, insistiu en que Casa Torre está abandona e nos fornos unicamente “quitouse unha chapa metálica, o que se fixo pasar como a gran intervención da Xunta na Tinería”, apuntou Rubén Arroxo. Tamén acusou á Xunta de manter o barrio en “unha precariedade absoluta”, lembrando que é “un dos poquísimos barrios do mundo que ten patrimonios da Humanidade”. Nesta liña, insistiu en que é “máis necesario que nunca investir en todas as cidades” debido tamén á falta de vivenda.
