A Garda Civil detivo a tres persoas buscadas por orde de distintos xulgados cando se atopaban nos municipios lugueses de Chantada, Meira e Ribadeo. Segundo informou este xoves o Instituto Armado, a arrestada en Chantada, de 44 anos, tiña unha requisitoria procedente do xulgado de instrución número 3 de Alxeciras (Cádiz) desde febreiro por un delito de estafa.

O detido en Meira ten 24 anos e estaba buscado polo xulgado de instrución núermo 2 de Mondoñedo, mentres que a arrestada en Ribadeo, de 56 anos, era requirida pola Audiencia Provincial de Lugo.

Ademais, a Garda Civil de Lugo tamén informou da investigación aberta contra un veciño de Sarria de 57 anos que foi sorprendido ao volante a pesar de carecer de carné.