A Intelixencia Artificial prevé que as cidades de Santander (+6,6%), Lugo (+5,4%) e Alacante (+4,9%) rexistrarán os incrementos máis elevados no prezo da compravenda de vivenda para finais do primeiro trimestre do 2025, segundo a análise que o portal inmobiliario Fotocasa realizou coa súa nova ferramenta de medición SmartPrice, combinando Big Data e Intelixencia Artificial.
O estudo permitiu elaborar predicións para todas as grandes cidades, determinando canto vai aumentar o prezo nos próximos tres meses; así, tras Santander, Lugo e Alacante, atópanse Murcia (+4,7%), Pontevedra (+4,4%), Toledo (+4,3%) e Oviedo (+3,9%).
Así mesmo, o comportamento dos grandes mercados virá marcado por aumentos nos seus prezos algo máis moderados, en Barcelona o incremento será do 3,5%; en Madrid, do 2,5%, e en Málaga o prezo prevé baixar ata un 3,7%. Outras cidades que experimentarán, segundo a IA de Fotocasa, reducións de prezos serán Las Palmas de Gran Canaria (-3,8%), Vitoria (- 4,9%), Ávila (-6,1%), Segovia (-6,6%), e Vigo (-7,5%).
“O mercado inmobiliario en España está a vivir tempos de gran dinamismo. Nestes momentos, para todos os axentes involucrados neste sector, é máis importante que nunca poder detectar cales serán as tendencias principais que moverán o mercado, especialmente no relativo aos prezos de compra e aluguer”, declarou a portavoz de Fotocasa, María Matogueiras.
