O exconcelleiro e profesor xubilado Antón Bao foi elixido responsable local do BNG de Lugo tras presentar a única candidatura ao organismo de dirección do Bloque en Lugo. Deste xeito, destacan os nacionalistas nunha nota de prensa, complétase o proceso de renovación dos organismos da fronte enmarcados nos traballos posteriores á Asemblea Nacional do BNG.
Na candidatura de Bao figuran o portavoz do BNG no concello de Lugo, Rubén Arroxo, e concelleiras e concelleiras na localidade, así como militantes vinculados a distintos sectores. “Afrontamos este novo período con ganas e forza para expandir o proxecto do BNG en Lugo”, explicou Antón Bao, que subliñou “a importancia” da militancia á hora de tomar decisións no partido.
Así, o Consello Local está formado por un total de 15 persoas, ás que se sumará a persoa elixida pola organización xuvenil do BNG, Galiza Nova. Ademais, Bao pasará a formar parte tamén do Consello Comarcal.
