Os senadores do PP de Lugo criticaron que o Goberno central “non ten intención de rebaixar o status de protección do lobo” e, ademais, “deriva aos seguros agrarios”.
Así o manifestaron os populares este xoves na Pastoriza tras reunirse con alcaldes e portavoces das comarcas da Terra Chá e da Mariña con gandeiros afectados polos ataques do lobo.
En concreto, os senadores do PP reprocharon que o Executivo central, en resposta á pregunta formulada para coñecer se tiña intención de retirar ao lobo da listaxe de especies silvestres en réxime de protección especial, argumentou que o estado de conservación da especie é “desfavorable-inadecuado ao norte do río Douro”.
Neste contexto, “á vista do número de avisos por ataques desde o 2021 que en Galicia se incrementou nun 72%”, os senadores defenden que o estado de conservación da especie “non é desfavorable”.
Por iso, reclaman ao Goberno que “rectifique e deixe de pór trabas administrativas ao control da especie para garantir o equilibrio entre a súa protección e a actividade gandeira”. Inciden en que “á vista da importante participación nesta convocatoria, trátase dun tema que preocupa aos gandeiros”.
“O que vimos ata agora é que o Goberno de Sánchez, coa complicidade do PSOE galego e do BNG, defende máis ao lobo que aos nosos gandeiros”, afean os representantes do PP de Lugo no Senado.
