O portavoz do Grupo Parlamentario Popular, Alberto Pazos, acompañado dos deputados lucenses Encarna Amigo, Raquel Arias e José Manuel Mato, reuníronse este mércores no Pazo do Hórreo con representantes dos veciños das parroquias de Lugo que están preocupados pola implantación dun proxecto para reciclaxe de residuos en Coeses.

Neste sentido, avanzaron a presentación dunha iniciativa parlamentaria para demandar á Xunta o “estrito cumprimento da normativa existente“, así como “rigor e transparencia” ás administracións implicadas na tramitación do expediente.

Segundo informa o PP nun comunicado, deputados populares compartiron cos veciños que “debe haber o máximo rigor á hora de informar sobre este proxecto” e escoitaron os motivos da súa preocupación.

Respecto diso, informaron de que, a día de hoxe, o proxecto da planta de biometano está no trámite de exposición pública e avanzaron que defenderán no Parlamento galego unha proposición non de lei na que se insta á Xunta a “velar polo estrito cumprimento da normativa existente, prestando unha especial atención ás garantías de carácter ambiental”.

Ademais, os populares dirixiranse ao resto das administracións implicadas para que adopten “leste mesmo rigor e transparencia na tramitación deste expediente”.