O tenente alcalde de Lugo, Rubén Arroxo, sinalou, ante a suspensión das festas de San Antonio no Castiñeiriño, que a seguridade “debe primar por encima de todo”.
Todo iso despois de que a comisión de organizadoras dos festexos decidise suspender as festas durante o fin de semana despois de celebrar dúas verbenas o xoves e o venres coas orquestras Panorama e Combo Dominicano, respectivamente.
Así, nun comunicado, explicou que o concello de Lugo autorizou a instalación das barracas que “tiñan a documentación en regra” e impediu a apertura das barracas que “non tiñan as mínimas garantías requiridas para os usuarios”.
Desta forma, remarcou que para a celebración das festas dos barrios é necesario entregar a documentación un mes antes, a pesar de todo adoitan “ser flexibles para facilitar a celebración das festas”.
“Os tempos teñen que ser razoables, xa que é moito traballo técnico de revisión o que hai que facer en base á actual lei de espectáculos”, incidiu Rubén Arroxo.
Neste sentido, engadiu que, “a pesar de ser coñecedoras dos prazos”, 15 días antes enviaron un requirimento á comisión de festas no que advertiron de que ou presentaban “inmediatamente toda a documentación” das 25 barracas que ían instalar, ou ía ser “materialmente imposible darlles autorización”.
Tras esa petición presentaron a documentación de nove barracas, que foron as “que autorizaron”. A última hora da mañá do martes presentaron “toda a documentación” dunha festa que empezaba a montarse o mércores, polo que era “totalmente imposible” para os técnicos municipais revisar a documentación.
Ante iso, o Concello trasladoulles a “imposibilidade” de instalar as atraccións coa correspondente actuación da Policía Local e “mantendo un constante diálogo cos organizadores”.
“No goberno municipal sabemos que a instalación de atraccións é unha das vías de financiamento das festas, pero isto non debe ser a escusa para que se admita todo, en calquera momento, e en condicións descoñecidas”, esgrimiu.
