O presidente da Deputación de Lugo, José Tomé, anunciou na Fonsagrada o inicio do proxecto Impulsa TIC, que dotará, de forma gratuíta, a 52 concellos de ferramentas tecnolóxicas para mellorar a xestión municipal.

Nun encontro con alcaldes, destacou que a institución provincial conta cun investimento de 4,5 millóns de euros de fondos europeos para desenvolver este novo programa de face á modernización e transformación dixital das entidades locais que, voluntariamente, queiran adherirse.

O presidente destacou que os concellos “gañarán en proximidade, transparencia e axilidade” con accións previstas no proxecto, que empeza mañá coa realización de auditorías e estará finalizado despois do verán. “Reforzamos un dos sinais de identidade da Deputación de Lugo como é a cooperación cos concellos”, expuxo na súa intervención nun encontro no concello da Fonsagrada.

A través do programa, a Deputación de Lugo proporcionará gratis ferramentas tecnolóxicas ás entidades locais “para avanzar na súa modernización e transformación dixital e, desa maneira, mellorar a xestión municipal e ofrecer un mellor servizo á cidadanía”.