A presidenta do PP de Lugo, Elena Candia, celebrou que haxa dúas persoas da provincia á fronte das consellerías de Mar e Medio Rural, en referencia a Alfonso Villares e María José Gómez, por tratarse de dúas áreas que supoñen o “motor da economía da provincia, pero tamén de Galicia”.
En declaracións aos medios, a tamén vicepresidenta do Parlamento de Galicia destacou que estas áreas están “en boas mans”. “Ambos veñen do municipalismo, coñecen a importancia dunha xestión eficaz e teñen experiencia en traballar con proximidade e humildade”, sinalou.
Elena Candia sostivo que “Lugo nunca dixo que ía dar ningunha loita personalista”, pero sostivo que “hoxe celebra” con toda Galicia que “dúas grandes persoas e mellores políticos” vaian estar á fronte de dúas áreas importantes.
Ademais, preguntada pola decisión do titular da Xunta, Alfonso Rueda, de suprimir as vicepresidencias no seu novo Executivo, subliñou que “o presidente ten autonomía e o referendo de todos os galegos para tomar as decisións que considere”. “E Lugo e eu persoalmente ímolo a apoiar”, indicou.
