Axentes da Policía Local de Lugo detiveron a un home de 40 anos de idade por un presunto delito de violencia de xénero despois de golpear a unha muller e tirala ao chan. Segundo informa a Policía Local, na madrugada deste mércores recibiuse un aviso de que “unha muller fora agredida pola súa parella”. Os axentes desprazados ao lugar atopáronse “un home na rúa chamando ao porteiro automático da vivenda da vítima”.

Posteriormente, engade, os efectivos falaron coa muller que se atopaba “tirada no chan, chorando e á beira do seu fillo menor de idade”. O mesmo manifestou que “o home chegara a casa bebido, gritando á súa nai” e, a continuación, “agarrouna polo brazo, golpeándoa e tirándoa ao chan”. O menor mostrou aos axentes un vídeo gravado co seu teléfono móbil “onde se ve a agresión”.

Os axentes procederon á detención do home, de 40 anos de idade e veciño de Lugo, por un presunto delito de violencia de xénero. O home foi trasladado a dependencias policiais onde se instrúen dilixencias para o xulgado correspondente.