Os comerciantes din notar a falta de actividade na campaña de Nadal, a unha data tan temperá coma o 4 de decembro. E Lugo Monumental alerta de que o efecto prolongarase no tempo pola demora no acendido do alumeado de Nadal, previsto como mínimo para o 14 de decembro. Os empresarios do centro histórico califican a tardanza de “torpedo na línea de flotación” do pequeno comercio.
A patronal considera “inaceptable” este retraso logo de considerar que “todo estudo e análise” conclúe que o alumeado de Nadal fomenta a afluencia de público e as compras. “Non se trata de fomentar o consumo, senón de onde se produce ese consumo”, precisan dende Lugo Monumental. “Os grandes centros comerciais hai semanas que locen as decoracións festivas, é evidente que saben que é un elemento crítico”.
Ignorando os avisos
A asociación empresarial ofreceu a súa colaboración ao Concello o 15 de xaneiro, precisamente para estudar a normativa municipal e o xeito de financiar e colocar o alumeado dentro do recinto amurallado. Lugo Monumental plantexaba retornar ao modelo anterior, no que as empresas pagaban os arcos de luz. Non houbo resposta.
Os comerciantes din que é “un tema reiterado” logo das protestas de 2015 por esta mesma situación. En setembro deste ano, advertiuse do retraso do prego de contratación, que achacouse a “problemas administrativos”. “Pode ser crible un ano, incluso dous, pero non todos. Se se comeza a tramitación en outubro e non chega a tempo, o lóxico é iniciala antes”, sinalan.
Coma sucedera en 2014, a adxudicación asinada o día 3 de decembro á empresa subministradora impedirá instalar o alumeado antes da ponte da Constitución. A medida incluso podería resultar nula de pleno dereito, alertan, por ter un contido imposible, ao esixir a prestación de servizo dende o 30 de novembro.
A concelleira de Economía, Ana Prieto, asegurou que o alumeado será “máis completo e bonito” que en anos anteriores, e calcula que o acendido producirase ben no día 14, ben no 15 de decembro. “Estamos traballando para apurar ao máximo os prazos, tanto dende os servizos técnicos como dende o equipo de goberno, para as tramitacións de todos os expedientes”. Neste senso, culpou á oposición de retrasar a aprobación dos orzamentos, o que levou “ao retraso de todos os expedientes”.
Propostas para o encendido
En Lugo Monumental son conscientes de que hai que evitar caer na “esaxeración”, e non cómpre adiantar demasiado o acendido das luces de Nadal. Tendo a ponte de decembro coma horizonte ineludible, os empresarios valoran unha data “próxima e moi significativa”: o aniversario da declaración da Muralla como Patrimonio da Humanidade. “O 30 de novembro non supón antelación desmesurada e ofrece un atractivo máis”.
