Cibercarracho acaba de incorporarse ao paseo das Palabras do Ano de Lugo. O presidente da Real Academia Galega, Víctor F. Freixanes, e o responsable de Patrimonio e Cultura da Fundación Barrié, o académico correspondente Diego Rodríguez, visitaron esta mañá a rúa Menorca acompañados do tenente de alcalde, Rubén Arroxo, e a concelleira de Cultura, Turismo e Promoción da Lingua, Maite Ferreiro. No pavimento desta vía loce xa a voz elixida como Palabra do Ano 2024 na elección promovida pola RAG e a Barrié a través do Portal das Palabras.
O presidente da RAG agradeceu a iniciativa do Concello de Lugo de fixar na rúa Menorca as voces escollidas nas votacións populares promovidas a través dunha iniciativa da que destacou precisamente a participación cidadá. Víctor F. Freixanes sinalou ademais que a última, “cibercarracho” -neoloxismo de carácter coloquial que designa os ciberdelincuentes– é “proba da vitalidade do idioma”. “Exemplifica como dende o humor e a creatividade a lingua ten enerxía interna para darlles resposta ás novas realidades que nos toca vivir”, engadiu.
Rubén Arroxo explicou que co paseo das Palabras do Ano o Concello de Lugo segue a traballar na mellora da imaxe da cidade e, ao mesmo tempo, pon en valor “un símbolo tan importante como a lingua galega”. O tenente de alcalde asegurou ademais que a rúa Menorca se converteu xa nun atractivo turístico máis de Lugo.
