O Corpo Nacional de Policía investiga en Lugo dous casos de abuso sexual acontecidos durante a fin de semana, os dous vencellados á posible administración de burundanga a senllas vítimas. Como recolle GaliciaConfidencial, dous homes resultaron detidos en relación coa denuncia dunha das mulleres, de 25 anos, que espertou sen recordar nada nunha pensión do centro da cidade.

A denunciante manifestara ante os axentes que saíra “de copas” por Lugo e que, contra as 03.00 horas da madrugada do sábado, aparecera na habitación da pensión “sen lembrar nada”. A Policía sinalou a posible presenza da substancia coñecida como burundanga, que leva á pérdida de consciencia, e procedeu á detención dos dous investigados. Non hai constancia de que roubaran á vítima.

Outra muller, de 27 anos, acudiu ao Hospital Universitario Lucus Augusti con síntomas semellantes, presentando cefalea e sen coñecemento do que ocorrera durante varias horas da noite anterior. Está por esclarecer se os abusos están conectados.

Exámenes forenses e toxicolóxicos

A Policía está pendente dos resultados das análises para determinar como se produciu a agresión sexual no caso da moza que apareceu na pensión próxima á praza Mártires de Carral.

A rapaza, que asegura que non lembraba nada do que sucedera dende as 03.00 ata as 11.00 horas, relata que espertou espida e canda a un home que non coñecía de nada. Este individuo é un dos dous detidos, de 38 e 43 anos, que están retidos nas dependencias policiais antes de pasar a disposición xudicial. Os sospeitosos están sendo investigados tamén por distribución de drogas.