O presidente da Xunta en funcións, Alfonso Rueda, reivindicou este venres a contribución da proba ‘O Gran Camiño’ como escaparate turístico de Galicia e á hora de “consolidar a comunidade como referente do ciclismo mundial”.
Rueda, que seguiu esta tarde parte do percorrido da etapa lucense, lembrou que máis de 120 corredores de todo o mundo se dan cita estes días nunha competición que se retransmite a 170 países e que consegue “millóns de reaccións nas redes sociais”.
Por iso, defendeu que ‘O Gran Camiño’ transcende o ámbito deportivo para converterse nunha “oportunidade única” para mostrar ao mundo o patrimonio, as paisaxes ou a natureza de Galicia e atraer a máis visitantes cara a comunidade.
‘O Gran Camiño’ é unha proba ciclista que percorrerá ata o vindeiro domingo as catro provincias, pasando por lugares emblemáticos como a Torre de Hércules da Coruña, A Ribeira Sacra, o interior de Ourense ou o Monte Aloia.
