O Concello de Lugo levará ao pleno ordinario do próximo xoves unha proposición na que busca o apoio da corporación para instar á Xunta a realizar unha prospección no río Miño, ao seu paso pola capital lucense, para que determine en que lugar resulta viable habilitar a zona pública de baño dentro da área da cidade, segundo o seu criterio.
Así o trasladou nunha nota de prensa na que detalla que o obxectivo desta iniciativa é “non perder máis tempo nin malgastar máis recursos públicos en atopar alternativas”, xa que, segundo apunta o consitorio municipal, “todos os informes técnicos presentados anteriormente polo Concello apoiando o proxecto na localización actual foron rexeitados pola Dirección Xeral de Patrimonio Natural a pesar de dar previamente o organismo autonómico o seu beneplácito á localización vixente e dispor da concesión do aproveitamento”.
Ademais, o texto recolle que, se fose nesario, o Concello de Lugo “comprométese a sufragar parcial ou totalmente o custo dos devanditos traballos”.
“Dispor dunha instalación que cumpra con esta demanda social é unha prioridade do grupo municipal socialista, como acreditan todos os pasos administrativos dados desde o inicio do expediente no ano 2016, pero, a pesar da vontade política e o investimento dedicado a este fin, atopámonos coa negativa sistemática da Xunta opóndose a que os e as lucenses fagan uso da concesión por 25 anos que esta administración ten autorizada no río Miño”, sinalou Miguel Fernández.
A proposta do equipo de Goberno fai referencia a toda a documentación técnica presentada polos servizos municipais con posterioridade ao 9 de noviembro de 2020, cando o Concello recibiu a concesión de apertura para a instalación da piscina flotantes.
