A Policía Local de Lugo informou dun dispositivo de vixilancia e control despregado este fin de semana con motivo dunha ‘quedada’ nocturna de coches no aparcadoiro dun centro comercial da cidade, e que se saldou con 5 condutores denunciados.
Así, fontes policiais explicaron que, con motivo deste evento, no que se concentraron uns 350 participantes, mobilizáronse varios indicativos do 092 e un vehículo camuflado, con apoio de dispositivos con cámaras.
Como resultado do operativo, un condutor foi denunciado por non pasar a ITV no prazo regulamentario, e outro máis foi denunciado por circular de forma “manifestamente temeraria“, póndose en perigo el e ao resto de usuarios da vía. Este condutor foi perseguido por unha patrulla, que chegou a alcanzar unha velocidade de 134 km/h, e foi finalmente denunciado por un suposto delito contra a seguridade viaria.
Por outra banda, tamén foron denunciados outro tres condutores por circular de forma neglixente, dous deles por derrapar na zona de aparcadoiro e outro facer ‘trompos’ nunha glorieta próxima.
DENUNCIAS
Por outra banda, axentes da Policía Local de Lugo denunciaron ao condutor dunha moto, que se viu implicado nunha colisión e tentou fuxir do lugar, e que circulaba en sentido contrario, sen carné e baixo os efectos das drogas.
Segundo informaron fontes policiais, os feitos ocorreron na tarde do venres, cando o motorista, repartidor de comida a domicilio, circulaba en sentido contrario pola rúa Cidade de Vigo e chocou contra un turismo. Tras a colisión, o motorista tratou de darse á fuga, pero a condutora do turismo perseguiuno e logrou retelo ata a chegada da Policía Local.
