O sindicato CIG-Saúde denunciou a “saturación” do servizo de urxencias do Hospital Universitario Lucus Augusti de Lugo (HULA), alertando da existencia de pacientes que esperan máis de 20 horas por unha cama.
Nun comunicado, a organización sindical criticou que na actualidade hai ata 12 pacientes pendentes do seu ingreso ou de pasar a observación, xa que este servizo tamén está a ter problemas ao non poder ingresar en planta ás persoas que xa non teñen que estar alí.
“A maioría deles chegaron a urxencias este luns entre as 21.00 e as 24.00 horas, pero hai unha persoa que está a esperar unha cama desde as 16.30 horas do luns”, criticou a CIG pasadas xa as 12.00 horas deste martes.
O sindicato asegurou que na actualidade hai unha planta de hospitalización na que só hai 10 pacientes, “e non se poden ingresar máis porque non desbloquean o resto de camas”, engadiu, lembrando que a CIG leva semanas denunciado esta situación.
“Os pacientes, unha vez máis, están a ser vítimas destas políticas e os traballadores saturados sacando o traballo como se pode”, subliñou, esixindo unha solución urxente.
