A Policía Local de Lugo instruíu dilixencias de denuncia contra o condutor dun tractor con remolque, que presentaba diferentes deficiencias e irregularidades, e que sufriu un incendio cando circulaba polo Paseo do Rato.

Os feitos ocorreron na tarde deste luns, cando o 092 recibiu un aviso para desprazarse a ese paseo fluvial, xa que se estaba producindo un incendio na parte traseira do remolque dun tractor. O incidente produciuse cando o tractor viraba cara ao paseo desde a estrada LU-530.

O lume foi sufocado coa axuda dun condutor e a intervención dunha dotación de bombeiros. Ao solicitar a documentación do vehículo, os axentes da Policía Local comprobaron que as placas de matrículas do tractor e do remolque non coincidían coas que constan nesa documentación.

Por outra banda, puideron observar que tres das rodas do remolque e unha do tractor non estaban en condicións mínimas para o seu uso, xa que carecían de debuxo, presentaban cortes nos flancos, e mesmo sobresaía un ferro dunha delas. Debido a esas deficiencias, os axentes abriron distintos expedientes sancionadores e procederon á inmovilización do tractor e o remolque.

OUTRAS INTERVENCIÓNS

Por outra banda, a Policía Local de Lugo tamén informou doutras intervencións. Así, unha dotación tivo que acudir á Praza da Constitución porque unha nova, que consumira marihuana e cocaína presentaba un comportamento moi agresivo. A Policía requiriu a presenza dunha ambulancia, que evacuou á moza ao hospital Lucus Augusti, acompañada por unha patrulla.

Así mesmo, a Policía Local levantou acta de denuncia nun local do barrio histórico por infracción da norma de espectáculos públicos de Galicia, ao exceder o límite horario.