Axentes da Policía Local de Lugo detiveron a un veciño da cidade como presunto autor dun delito de violencia de xénero, tras supostamente ameazar de morte á súa parella, algo que ocorreu en presenza da filla da vítima. Segundo informaron fontes policiais, os feitos ocorreron na tarde do pasado sábado, cando o 092 recibiu un aviso para acudir a un domicilio por un posible episodio de violencia de xénero.

Ao chegar, os axentes entrevistáronse coa muller que requirira o servizo, e esta relatoulles que sofre insultos por parte da súa parella de maneira frecuente e que, nesa ocasión, aínda que non agredira fisicamente, ameazáraa de morte. A súa filla, de 19 anos, corroborou a versión da nai, e engadiu que ese día o home cambiara a fechadura da vivenda para “expulsalas” do domicilio. De feito, os policías comprobaron que a fechadura, efectivamente, parecía nova e só lle faltaba un parafuso para fixala á porta. Por todo isto, os funcionarios procederon á detención do home.