Axentes da Policía Local de Lugo identificaron a unha muller como presunta autora dun furto nun establecemento comercial da rúa San Roque.

Segundo informaron fontes policiais, os feitos ocorreron pasadas as 21,00 horas deste martes, cando unha dotación da Policía de Barrio patrullaba por San Roque e observou a unha muller que irrompía na calzada e tropezaba, deixando caer varias pezas de bixutaría.

Cando os axentes acudiron a auxiliala, porque se caeu ao chan, achegouse o empregado dunha tenda próxima, e que informou os axentes de que esa muller era coñecida no seu local por cometer furtos, e que fora gravada polas cámaras de segurida subtraendo efectos do comercio.

Os policías procederon á identificación da sospeitosa, tendo en conta que o responsable da tenda manifestou a súa intención de presentar denuncia, e devolveron os efectos furtados ao establecemento.

Por outra banda, a Policía Local tamén informou, entre outras intervencións, da retirada dun cabalo morto este martes pola tarde, que foi localizado na parroquia de Muxa da Arriba, e do inicio das pescudas para dar co seu propietario.

Así mesmo, fontes policiais notificaron un incendio, rexistrado a última hora da tarde do martes no barrio de Nazaret. As chamas declaráronse nunha zona de acumulación de residuos, e na súa extinción participaron efectivos de bombeiros forestais da Xunta e do servizo municipal de bombeiros.

SEGURIDADE VIARIA

En materia de seguridade viaria, nas últimas horas a Policía Local tramitou denuncias contra catro condutores por circular sen pasar a ITV no prazo regulamentario, e contra outro que circulaba sen o seguro obrigatorio.

Tamén foi denunciado un condutor que levaba no coche a un menor sen o sistema de retención infantil; outro que tiña permiso de conducir estranxeiro, non válido en España; e outros dous condutores que deron positivo na proba de alcoholemia (un deles co carné retirado por sentenza xudicial).