O tenente de alcaldesa de Lugo, Rubén Arroxo, anunciou que este luns comezará a renovación da Avenida das Américas. “O obxectivo é que esta renovación se complete durante este mesmo mes”, asegurou.
En concreto, intervirase no tramo da avenida que vai desde a rúa Pomar ata a Fonte dos Ranchos, garantindo o bo estado dunha das rúas de Lugo que máis tráfico acolle.
“Comezamos coa renovación da parte final da rúa, a que comunica coa N-540, e con esta nova intervención cumprimos o obxectivo de renovar esta rúa por completo”, explicou o tenente de alcaldesa.
Nunha primeira fase, correspondente ao corte da Avenida das Américas desde a praza Fonte dos Ranchos, ata a rúa Pomar, a saída da cidade distribuirase por dúas vías alternativas.
A primeira delas corresponderá ao itinerario Rolda do Carme desde a praza da Fonte dos Ranchos, Marqués de Ombreiro, rúa Alcalde Carlos V. Pimentel e glorieta da Avenida das Américas.
A segunda comezará na praza da Fonte dos Ranchos, Rúa Doutor Ochoa, rúa da Saúde e rúa Pomar, na que se cambiará o sentido da circulación. Estes cambios afectarán ás liñas 5DS, 5.1, 5E, 5.2, 8 e 11 que, despois de superar os tramos provisionais con parada nas rúas indicadas, incorporaranse de novo cumprindo o percorrido habitual.
