Unha discusión nun establecemento hostaleiro da rúa Nova de Lugo terminou cunha muller denunciada por dirixirse de maneira despectiva aos axentes que acudiran tras recibir unha chamada de que había unha muller increpando e molestando aos clientes do local.
Tal e como detallou a Policía Local, os feitos sucederon este xoves. Os axentes foron informados de que, con motivo dun “rozamento fortuíto” coas persoas da mesa da beira, caera ao chan unha copa, momento no que unha muller se dirixiu cara aos membros desa mesa de forma “despectiva e insultante”.
Así, ao chegar a Policía Local procedeu a identificar ás partes pero, ao identificar á muller, esta dirixiuse aos axentes “de maneira despectiva”, polo que foi denunciada por infracción á Lei Orgánica de Protección de Seguridade Cidadá por “falta de respecto e consideración aos axentes da autoridade no exercicio das súas funcións”, levantando o correspondente parte de intervención.
Por outra banda, efectivos da Unidade Territorial de Policía de Barrio da Policía Local de Lugo detectaron un concerto nunha terraza dun local de hostalaría da rúa Santiago que non dispuña de licenza para este tipo de actuacións.
Neste caso, os axentes levantaron acta de denuncia por infracción á normativa de espectáculos públicos de Galicia, ademais de ser denunciado tamén por carecer da correspondente póliza de seguros.
