Efrén Castro e Iria Castro Fernández serán os representantes do BNG na Deputación de Lugo a partir da conformación da corporación provincial. Así quedou ratificado no acto celebrado no xulgado de Lugo onde as concelleiras e concelleiros electos da xunta electoral de zona de Lugo elixiron os deputados provinciais conseguidos tras as eleccións municipais do 28 de maio, onde o BNG conseguiu dúas actas. Ademais de ser referendadas polos correspondentes órganos da fronte nacionalista.
Deste xeito, o BNG reivindica que fai unha aposta pola renovación, dado que sae Maite Ferreiro (quen ocupou a Vicepresidencia primeira da institución) da Deputación, e tamén pola continuidade do grupo provincial na Deputación de Lugo, a través de Efrén Castro.
O papel do BNG, remarca a propia formación, será clave para a gobernabilidade da institución. Efrén Castro é o actual portavoz do BNG no concello de Sarria e foi o portavoz provincial no mandato 2019-2023. Iria Castro Fernández é concelleira nacionalista en Castroverde.
