Dúas mulleres tiveron que ser evacuadas, unha delas con síntomas de inhalación de fume e outra cunha crise de ansiedade, ao producirse un incendio nunha das vivendas dun edificio en Lugo.
Todo ocorreu pasadas as 19,30 horas da tarde do luns, cando varios veciños se puxeron en contacto co 112 Galicia para alertar deste lume rexistrado no quinto piso dun inmoble da Avenida de Garabolos. De feito, un dos alertadores explicaba que os ocupantes permanecían no interior do domicilio, do que saía un fume negro pola porta que xa invadía o descansillo.
Seguidamente, o 112 puxo os feitos en coñecemento de Urxencias Sanitarias de Galicia-061, dos Bombeiros de Lugo, da Policía Nacional e Local, e dos voluntarios de Protección Civil.
Os servizos de emerxencias conseguiron sacar a unha persoa que se atopaba no interior do piso cando se orixinou o incendio. Esta e outra ocupante da vivenda foron evacuadas ao Hospital Universitario Lucus Augusti (HULA), unha por inhalación de fume e outra cunha crise de ansiedade.
APAGADO O INCENDIO NUNHA EXPLOTACIÓN EN MURAS
Por outra banda, os bombeiros de Vilalba (Lugo) concluíron ao redor das 22,00 horas as tarefas de extinción do incendio –provocado por un raio– que calcinou por completo e fixo colapsar a nave dunha explotación gandeira no municipio de Muras.
