InicioPolíticaCandia nomea equipo e advirte que se non a deixan gobernar non...

Candia nomea equipo e advirte que se non a deixan gobernar non dará “os cen días de graza”

A aspirante popular insiste en ofrecer un pacto a PSOE e BNG para que sexa a forza máis votada a que goberne na capital lucense Enrique Rozas exercerá de viceportavoz de Candia no Concello de Lugo, e Ameijide será deputado provincial.

PUBLICADA O

- Advertisement -

A candidata do PP á Alcaldía, Elena Candia, quen quedou o pasado domingo 28 de maio ás portas da maioría absoluta, será a portavoz do grupo municipal, coas áreas de Economía e Cultura, mentres que Enrique Rozas, será o viceportavoz e responsable das áreas de seguridade, participación (atención á cidadanía) e deportes.

E en clave provincial, a proposta do grupo municipal para o representante na Deputación de Lugo é Antonio Ameijide, ata agora viceportavoz no Consistorio. O concelleiro, que se encargará de infraestruturas e mobilidade, collerá a substitución de Óscar Poy, que ocupou o cargo o últimos catro anos.

Candia presentou este luns, acompañada polos 11 populares candidatos que entrarán na corporación o vindeiro sábado 17 de xuño, a estrutura do grupo municipal, e tamén avanzou a estratexia e a repartición de áreas que acordou cos integrantes da agrupación. “Cada persoa do equipo terá unhas responsabilidades de traballo cun dobre obxectivo: por unha banda, fiscalizar as accións do goberno e, por outra banda, facer un traballo propositivo”.

Os populares fixeron este anuncio tras rexistrar unha carta dirixida á candidata do PSOE, Lara Méndez, e ao aspirante do BNG, Rubén Arroxo, solicitando senllas reunións. E é que Candia insistiu na oferta dun pacto para que sexa o PP, a forza máis votada, a que lidere o goberno de Lugo.  “De rexeitar este ofrecemento e reeditarse o pacto de perdedores non tería sentido darlles os cen días de graza, nin esperar nin un só día para xulgar as súas accións políticas. Non sería xusto nin razoable”, avisou a dirixente popular.

“OPOSICIÓN ESIXENTE E FIRME”

O equipo do grupo popular combinará a experiencia de cinco persoas que tiveron ou ten na actualidade responsabilidades en política municipal (a candidata, Rozas, Ameijide, Javier Vázquez e Mar Carballas) mentres que os seis restantes estréanse na área de política.

“Faremos un traballo positivo e unha fiscalización esixente e firme do bipartito. Seremos os ollos e os oídos de todos os lucenses os 365 días, as 24 horas tanto dos que votaron ao PP como dos que non o fixeron”, remarcou, convencida de que “non hai tempo que perder”.

En canto ao resto de áreas, Cristina Sanz ocuparase de fondos europeos e seguimento Lugo Transforma; mentres que Javier Vázquez levará educación; Flor Rubinos atención ás 54 parroquias da zona rural; e Sivia Colmenero, comercio, industria, consumo e medio ambiente (compartirá con Ameijide unha subárea deste eixo).

Pola súa banda, Ramón Cabarcos ocuparase de rehabilitación e urbanismo; Agustín Gallego, turismo e promoción do municipio; Aurora Goás, muller e igualdade; Gustavo Díaz, benestar social, migración e voluntariado; e Mar Carballas, recursos humanos e atención á infancia e á mocidade.

ÚLTIMAS

Os Andares, un proxecto de inmersión sonora para redescubrir os Ancares

Os Andares, un proxecto artístico-inmersivo sobre a memoria emocional dos territorios, presenta seis viaxes...

Suspendido o xuízo contra un home acusado de ameazar a dúas persoas cunha escopeta

O xuízo oral contra un home acusado dun delito de tenencia ilícita de armas...

Non sae adiante a iniciativa parlamentaria do BNG para frear a instalación de Altri en Palas

A comisión 8ª de Pesca e Marisqueo do Parlamento de Galicia rexeitou este martes unha proposición...

Un veciño de Melide sería o autor de varios incendios nunha mesma zona da Serra do Careón

A Garda Civil investiga a un veciño de Melide, de 33 anos de idade, como suposto...