Axentes da Policía Local de Lugo detiveron a un home acusado dun suposto delito de violencia de xénero, tras ser alertados os axentes por varios viandantes o pasado 30 de abril, ás 23,35 horas.
Segundo o relato policial, varias persoas que camiñaban pola rúa viron a unha parella que mantiña unha “forte discusión” e “aínda que non observaron ningunha agresión” (física), a “actitude que mantiña o home, atendendo á furia dos seus xestos e ao ton das súas palabras, podería desembocar nun ataque físico”.
Ademais, engadiron estas testemuñas que o home “portaba nunha man algo que non puideron observar ben, pero que podería tratarse dunha arma branca”.
Desta maneira, estableceuse un dispositivo de procura, que localizou á parella nas inmediacións. Os axentes separaron a un doutro como medida preventiva e para que puidesen falar de “forma máis reservada”.
A muller non formalizou denuncia e tampouco quixo ser trasladada a un centro médico ou ser asistida no lugar. En todo caso, os axentes detiveron ao home e trasladárono a dependencias policiais para a tramitación das dilixencias correspondentes como presunto autor dun delito de violencia de xénero.
