A sección segunda da Audiencia Provincial de Lugo condenou a once anos de cárcere a un home por agredir sexualmente, de forma continuada, á filla da súa parella desde 2013, cando a menor tiña doce anos, ata 2015.

O tribunal considera probado que o acusado, “prevalindose da convivencia familiar coa menor”, conseguiu “dobregala aos seus requirimentos sexuais e comezou a ter relacións sexuais con ela en 2013, aproveitando unha viaxe da súa nai á República Dominicana”.

Ademais de once anos de prisión, os maxistrados impuxéronlle a prohibición de aproximarse e comunicarse coa vítima por calquera medio durante dez anos, así como oito anos de liberdade vixiada, a privación da patria potestade e inhabilitación para o exercicio dos dereitos de patria potestade, tutela, curatela, garda e acollemento por tempo de oito anos, e inhabilitación especial para calquera profesión ou oficio que leve contacto regular e directo con menores de idade por un tempo de dez anos. Así mesmo, en concepto de responsabilidade civil, o procesado deberá indemnizar á vítima con 9.000 euros.