A Policía Local de Lugo detectou o pasado venres a un home de 70 anos que portaba unha mangueira e camiñaba “en actitude vixiante” na rúa da Hortensia, en Lugo.

Así, os axentes localizaron a esta persoa escondida, tombada á beira dun vehículo e procederon a identificala. Nese momento, o home portaba unhas luvas que, xunto coa roupa que levaba, desprendían “un forte cheiro a combustible”.

Deste xeito, os axentes realizaron unha inspección polas inmediacións e observaron un camión que presentaba o tapón do gasoil forzado con varias garrafas baleiras, mangueiras, ferramentas e combustible na calzada.

Posteriormente, a preguntas dos axentes sobre a súa actitude, o home non achegou “ningunha explicación coherente”, polo que se instruíron dilixencias para o xulgado de garda como presunto autor dun delito de danos e intento de subtracción de gasoil. Así mesmo, interviñeron as garrafas, as gomas de plástico e as ferramentas para levar a cabo estes feitos.