A dous días de Noitevella, a alcaldesa de Lugo, Lara Méndez, fixo un balance “tremendamente positivo” do ano 2022 para a súa cidade, a pesar da situación económica “de crise” derivada da guerra de Ucraína e a inflación disparada.

Antes de que comezase o último pleno ordinario do ano no Concello, a rexedora parouse ante os medios de comunicación para facer este balance baixo o prisma de “contextualizar estes anos tan difíciles” por mor da pandemia e os seus efectos. Méndez celebrou o ser “capaces de seguir” coa súa folla de ruta, “priorizando as familias máis vulnerables” e envorcándose no goberno local “na dinamización económica da cidade”.

Con todo, tamén en declaracións previas ao pleno, o portavoz municipal do PP, Ramón Carballo, acusou á alcaldesa “de estar máis pendente de facer oposición a Elena Candia”, a candidata dos populares.

Precisamente, os socialistas responsabilizan a Candia de trasladar un anónimo á Fiscalía en 2013 que logo se incorporou ao sumario da Operación Pulpo, na que estivo imputado o expresidente da Deputación de Lugo e exlíder do PSdeG José Ramón Gómez Besteiro.