O responsable do sector de alimentación da CIG, Cristián López, celebrou o interese da firma láctea asturiana Reny Picot pola planta de Tegestacín, situada no concello lugués de Outeiro de Rei e que formou parte do Grupo Leite Pascual.

Con todo, en declaracións aos medios este venres, apelou a estudar a posible compra, valorada en 2,5 millóns de euros, “con moita cautela porque é unha operación pendente de autorización e confirmación”.

“Parece unha boa noticia porque no sector lácteo cando se recupera a actividade nunha factoría e así realmente está dedicada a facer transformación e elaboración de produto, iso supón unha capacidade de emprego efectivo”, destacou, antes de subliñar que a central nacionalista está “pendente de ver como se materializa esa operación e esa oferta”.

“Hai que ter en conta a historia destas instalacións, na transformación de produtos funcionaron ben, cando se afastaron desa formulación e se dedicaron a ser meros centros de cisterneo e de contrabando de leite, non tiveron capacidade de transformar emprego”, sinalou. Con todo, o sindicalista da CIG considera que é “unha boa noticia” para un centro que a compañía Tegestación “dedicouse a despezar”.

“Iso levounos a presentar unha demanda de insolvencia punible (a Tegestacín). É unha pena que non prosperasen as medidas cautelares que se solicitaron no seu día”, lamentou. Dos traballadores de Tegestacín, que chegaron a ser máis de 70, López puntualiza que “as relacións laborais concluíron coa anterior empresa”.