Buscan dous cans que mataron varias galiñas nunha vivenda en Santa María Alta, en Lugo. Axentes do Grupo Operativo Nocturno da Policía Local de Lugo acudiron ás 23,45 horas ante a alerta dun ataque dos cans no interior dunha explotación.
Os donos da explotación detectaron que, ademais das varias galiñas mortas, desapareceran outrAS catro máis, o cal foi comunicado aos axentes, xunto coa descrición dos cans que perpetraron o ataque.
Segundo informa a Policía Local, os axentes realizaron varias roldas polo lugar, sen que puidesen localizar “os animais agresores”, polo que as indagacións para a súa localización “continuarán nos días posteriores”.
Doutra banda, durante este mércores, a Policía de Barrio acudiu á Praza do Campo Castelo ante a caída dunha árbore neste emprazamento tras recibir a alerta e xestionaron a retirada a cargo da empresa de mantemento das zonas verdes.
No parte da policía tamén se recolle o aviso dun incendio nun edificio da Rampla de Claudio López, por abundante fume no inmoble. Así, tomáronse as medidas preventivas para asegurar a zona e, finalmente, púidose pescudar que se trataba dun defecto no queimador da caldeira, que foi desconectada por un veciño ante a situación xerada, polo que xa non foi necesaria a intervención dos Bombeiros.
