O Concello de Lugo mantén pechadas con precinto dúas atraccións das festas de San Froilán durante este martes despois de detectarse unha subida dos prezos, o cal “imcumple as bases do prego” de contratación coa administración local.
Así o confirmou a concelleira de Cultura, Turismo e Promoción da Lingua, Maite Ferreiro, quen detallou que o goberno municipal abriu expediente sancionador a ambas as atraccións, coñecidas como ‘El Ciclón’ e ‘Rodeo Show‘, por subir o custo da entrada.
Segundo explicou Ferreiro, os pregos establecen que nin os prezos nin a duración da viaxe “poderán sufrir alteracións” durante os días que duren as festas. A clausura fíxose efectiva desde as 00,00 horas deste martes e durará toda a xornada deste 11 de outubro, en vésperas do festivo do 12 de outubro, ata cando se prolongan as festas.
Así mesmo, o Concello de Lugo decidiu pechar catro postos de venda situados na contorna do recinto feiral por situar a súa mercadoría na vía pública en reiteradas ocasións, a pesar das advertencias realizadas tanto por parte da Policía Local como dos comisarios das festas.
