Máis de 100 mulleres participan no programa ‘Feminino Rural’, no que colaboran a Asociación de Mulleres Empresarias dá Provincia de Lugo (AELU) e a Deputación, para recibir formación e asesoría gratuíta para mellorar os negocios que teñen en marcha e favorecer a súa viabilidade.
É o dato que destacou a responsable de Réxime Interior, Promoción do Territorio e Turismo do goberno provincial, Pilar García Porto, quen este mércores participou en Antas de Ulla nun xantar cunha trintena de beneficiarias deste programa. Tamén asistiu a presidenta de AELU, Beatriz Varela.
García Porto destacou a “boa acollida” de ‘Feminino Rural’ con máis dun centenar de mulleres involucradas, principalmente nas comarcas da Ulloa, A Terra Chá e Lugo, e con 40.000 euros de apoio por parte da Deputación.
As actividades empresariais que queren desenvolver ou xa desenvolven as participantes son moi diversas e van desde servizos forestais, turismo rural, organización de eventos e publicidade, ata teares e traballos artesanais.
