Tanto o PSdeG-PSOE como o BNG teñen claro que a presidenta do PP na provincia de Lugo e recentemente desvelada como candidata á Alcaldía da capital, Elena Candia, será a líder da oposición tras as eleccións municipais de 2023.
Desde as filas socialistas, o vicesecretario provincial do partido e alcalde de Castroverde, José María Arias, valorou de “forma positiva” para a alcaldesa e candidata do PSOE, Lara Méndez, que o PP leve á que durante tres meses, en 2015, foi presidenta da Deputación de Lugo.
O ‘número dous’ do PSOE provincial destacou que Méndez é xa “unha alcaldesa consolidada (cumprirá oito anos), que ten a súa familia en Lugo, que leva anos en Lugo e que antes foi vicepresidenta da Deputación”.
Iso si, aínda que admite que Candia, exrexedora de Mondoñedo, é “unha boa rival, porque é boa política”, Arias recoñece que “aínda así é alcanzable para que o PSOE obteña un bo resultado”.
Por parte do BNG, o tenente de alcaldesa, Rubén Arroxo, dixo “respectar os procesos internos” doutros partidos, pero ve “totalmente negativo que a futura líder da oposición no Concello de Lugo sexa unha persoa que non vive en Lugo”.
“Non viviu nunca na cidade, non está censada en Lugo e non ten ningunha vinculación con Lugo. Na oposición é moi importante que a persoa que a lidere non estea totalmente desconectada da cidade. Candia só vai nas listas para poder aspirar a presidenta da Deputación e iso é moi negativo para Lugo”, censurou o nacionalista.
Neste contexto, Arroxo reivindicou que “Lugo ten que seguir avanzando e tense que ter un proxecto político claro”. “Isto non pode ser un trampolín, porque é unha falta de respecto para Lugo”, lamentou.
