A plataforma veciñal Galicia Baleira, que agrupa a asociacións da provincia de Lugo e de Ourense, estuda “dar o salto á política” e analiza a posibilidade de presentar candidatura nas eleccións xerais do próximo ano. O presidente desta plataforma, que lidera tamén o movemento veciñal de Lugo, Jesús Vázquez, asegurou que “dar o salto á política é unha posibilidade que está aí, e é unha posibilidade para dar un toque xeral aos partidos políticos”.
E exponse agora “en función dunha serie de axudas que saíron por parte da Xunta nas cales para solicitar cousas tan sinxelas como cambios de xanelas, melloras enerxéticas practicamente hai que facelo a través de Internet”. “Desde Galicia Baleira levamos moito tempo pedindo que se achegue a administración aos cidadáns. Moitos cidadáns desgraciadamente nas zonas rurais de Lugo e Ourense non teñen nin sequera cobertura, non teñen ordenador e non manexan os medios tecnolóxicos e sacar axudas dicíndolle á xente que faga o que non pode facer é un contrasenso”, afeou.
Jesús Vázquez apelou a que piden desde hai “moito tempo” o “portelo único, coa coordinación das distintas administracións, en definitiva achegar a administración aos cidadáns”. O presidente de Galicia Baleira reivindicou, ademais, que “se forme tecnoloxicamente aos cidadáns, e levar a rede de comunicación, que hoxe non hai, ás zonas rurais de Lugo e Ourense”. Por tanto, por parte desta plataforma veciñal reclaman “unha administración eficaz, que acurte os prazos, que sexa próxima ao cidadán e facilítense as cousas”.
