A Deputación de Lugo traballa no desenvolvemento e articulación do primeiro plan de igualdade da institución, que pretende “modernizar o sistema de xestión” para contar cunha “estrutura e unhas relacións coa sociedade guiadas pola igualdade de xénero”.
Así o explicou a portavoz do goberno provincial, Pilar García Porto, tras a convocatoria dunha xunta de portavoces na que o presidente da Deputación luguesa, José Tomé, trasladou aos grupos a intención de elaborar este plan.
O vindeiro mércores procederase á constitución da comisión encargada de coordinar os traballos para redactar o plan de igualdade. Este órgano estará composto por oito persoas que representarán ao goberno da institución, o seu persoal e organizacións sindicais.
Por outra banda, a xunta de goberno provincial aprobou unha partida de 33.000 euros para a dixitalización das 126.000 páxinas do Boletín Oficial da Provincial (BOP) entre os anos 1834 e 1961.
“Damos un paso máis para aumentar a accesibilidade e salvagardar toda a información que recollen lestes documentos, que conforman unha parte moi importante do patrimonio e da historia da nosa provincia”, resaltou García Porto.
