O delegado do Goberno en Galicia, José Miñones, situou este mércores a recuperación dun edificio histórico de Lugo como nova sede do Instituto Nacional de Estatística (INE) como exemplo da aposta do Goberno por impulsar proxectos para esta cidade.
Así o sinalou durante unha visita ao restaurado edifico do antigo Sanatorio Portela, na que estivo acompañado pola alcaldesa, Lara Méndez, e o director provincial do propio INE, José Manuel Colmenero.
“Estamos diante dun bo símbolo da aposta que fai este Goberno por Lugo, polo futuro do seu patrimonio e dos servizos públicos, que tamén se reflicte no orzamento e no plan de recuperación”, afirmou no acto do que informou a Delegación do Goberno nun comunicado.
José Miñones puxo en valor a actuación para recuperar o patrimonio arquitectónico da man do Ministerio de Asuntos Económicos e Transformación Dixital e do seu titular, a vicepresidenta primeira Nadia Calviño. Nese sentido, lembrou que o Goberno fai tamén unha “clara aposta” pola rehabilitación do patrimonio e dos espazos públicos, dos que este inmoble é un “elemento notable”.
“O Goberno xa ten comprometidos para Galicia un mínimo de 220 millóns de euros para rehabilitación e rexeneración urbana dentro do Plan de Recuperación, máis de 27 deles destinados á rehabilitación de edificios públicos pertencentes á Xunta aos que se sumarán os proxectos que acheguen os concellos e deputacións”, engadiu para sinalar que, a estes fondos, súmase unha nova transferencia de 67 millóns de euros á Xunta para rehabilitar vivendas e barrios.
O obxectivo é que as cidades e pobos galegos “aproveiten e poñan en valor todo o seu patrimonio, porque é unha herdanza que non se debe dilapidar” dentro da procura dunha “economía que creza da man dunha recuperación xusta”. “Buscamos gañar espazos para a cidadanía e transformar as cidades”, sinalou.
“Traballamos para que Lugo e a súa provincia deixen de estar no furgón de cola, como demostra polo proxecto de orzamentos xerais do Estado para 2022, xa que “é a segunda provincia en investimento por habitante por parte do Ministerio de Transportes”.
Así, concretou que o departamento destina a esta provincia 298,12 millóns de euros para avanzar nas infraestruturas, o que supón unha cantidade de case 915 euros por persoa residente na provincia”, continuou.
NOVA SEDE DO INE
Segundo destacou a Delegación do Goberno en Galicia, o INE comprou o edificio, que levaba anos abandonado, en 2006 por 1,8 millóns de euros. As obras desbloqueadas polo Goberno actual, nas que se vacó por completo o interior, supuxeron un investimento de 2,4 millóns.
Ademais da recuperación dun edificio destacado do patrimonio arquitectónico da cidade, a nova dotación supón un importante aforro para o erario público xa que o INE pagaba 100.000 euros anuais de aluguer da súa sede anterior.
O edificio é un ben que está rexistrado no Inventario de Patrimonio Cultural de Galicia. Foi construído a mediados do século XX, por encargo de Manuel García Portela, de acordo cun proxecto do arquitecto Alfredo Vila López, e que estivo destinado orixinalmente a uso sanitario.
