A Deputación de Lugo puxo en marcha o programa de acompañamento á dixitalización ‘Re-iníciache’ que, en colaboración co Ministerio de Industria, diríxese a 500 empresas da provincia.

Na presentación da iniciativa na sede da institución e acompañado por empresarios e representantes de asociacións, o presidente da Deputación de Lugo, José Tomé explicou que esta actividade se enmarca no Plan de Impulso da Economía da provincia, para favorecer a recuperación do tecido produtivo logo do impacto da pandemia.

Segundo detallou, esta nova medida trátase dun programa de atención e asesoramento personalizado que se ofrece de forma gratuíta a todas as empresas da provincia para axudalas a aproveitar os recursos das novas tecnoloxías e modernizar así o seu negocio.

“É un programa para que as empresas, grazas á dixitalización, gañen en competitividade, en produtividade, en eficiencia e, en definitiva, que abran novas oportunidades de negocio”, detallou.

Este programa diríxese a 500 empresas, que poden adherirse desde este mércores a través da páxina web provincial, e conta cun orzamento duns 1.080.000. “Serviranos para impulsar o proceso de transformación dixital da provincia, que é un dos grandes retos de futuro”, sinalou.

Desta cantidade, a Deputación achega “algo máis do 14 por cento, sobre 152.000 euros, e o resto achégao a Escola de Organización Industrial, concretamente uns 930.000 euros”. “Poderán participar 500 empresas de calquera sector ou de calquera actividade e de calquera dos 67 municipios da provincia”, incidiu.

“En canto ao tamaño das empresas”, explicou que “non hai ningunha limitación” pero detallou que o obxectivo é dirixirse ás “máis pequenas, ás medianas e aos autónomos”, “que son os que teñen máis dificultades e son ademais o verdadeiro músculo da nosa economía”.

O programa contempla “xestión de dixitalización”, “desenvolvemento do negocio dixital” ou “reto en comunicación dixital”, entre outras accións.