O programa ‘Coñece a túa provincia’ da Deputación de Lugo abre este xoves o prazo de reserva de praza, que se estenderá ata o 30 de xullo, para asociacións e entidades sen ánimo de lucro. O plan do ente provincial contempla diversas viaxes polo territorio lucense que sairán de forma “totalmente gratuíta”. De aí que os fondos do proxecto ascendan a 300.000€.
Esta primeira tempada contará cun máximo de 1.241 prazas para viaxes entre setembro e decembro. Os colectivos poderán escoller entre un total de 37 itinerarios para coñecer o patrimonio natural, histórico, cultural e gastronómico da provincia. Iso si: será entre outubro e decembro e só en días laborables non festivos.
Para inscribirse, as asociacións deberán presentar a correspondente solicitude a través da Sede Electrónica da Deputación ou ben no Rexistro Xeral da institución. Toda a información para realizar a solicitude, así como as características e as condicións para participar nesta iniciativa pode consultarse no Boletín Oficial da Provincia (BOP) de hoxe, 30 de xuño, e na páxina web da Deputación de Lugo, a través da Área de Turismo.
“As viaxes”, apuntan dende a Deputación, “desenvolveranse entre a segunda quincena de setembro e o mes de novembro, en días laborables agás festivos. En todo caso, o Servizo de Turismo da Deputación determinará os días concretos nos que finalmente se realizarán as excursións”.
Todos eles incluirán, de balde, transporte, póliza de seguros de viaxeiros, menú, e entradas aos diferentes lugares de interese. O presidente da institución, José Tomé, destacou este programa que “nace con vocación de continuidade” e que responde ao modelo turístico polo que aposta a Deputación: “de calidade, sustentable, non masificado e que pon en valor o patrimonio”.
