A directora xeral de Administración Local, Natalia Prieto, fixo este mércores balance do plan de loita contra a vespa velutina acordado entre Xunta e Fegamp, e que, destacou, desde a súa posta en marcha a finais de xaneiro permitiu a retirada de máis de 16.700 niños. Deles, máis de 2.000 atopábanse en Lugo.
Así o explicou durante unha reunión no Centro de Atención a Emerxencias (CIAE) 112 Galicia con representantes da empresa pública Seaga e da central de chamadas do 012, na que tamén participaron o director xeral de Emerxencias, Santiago Villanueva, e o xerente da Axega, Marcos Araújo.
No encontro abordouse a renovación para o próximo ano do encargo a Seaga no marco deste Plan a través do que a Xunta ofrece unha atención centralizada e coordinada cos concellos para facer fronte ao aumento da presenza da vespa velutina en Galicia nos últimos anos. Trátase dun Plan dotado este ano con 2,3 millóns de euros de fondos propios da Xunta e do Fondo de Cooperación Local, ao que se adheriron 285 concellos, o que supón o 90% dos municipios galegos.
INTERVENCIÓNS
Por provincias, o operativo de Seaga integrado por 80 efectivos, eliminou ou neutralizou desde o comezo do encargo en xaneiro ata mediados deste mes 8.460 niños de vespa velutina na Coruña, máis de 2.000 en Lugo, máis de 1.300 en Ourense e case 5.000 en Pontevedra.
A maioría dos niños foron retirados nun prazo de menos de cinco días hábiles, o tempo de resposta establecido, ao estar situados a menos de 25 metros de altura e en lugares accesibles.
En canto á evolución anual do número de avisos, o primeiro semestre e este decembro foron os meses de menos avisos, debido a que a maioría dos niños están inactivos. Pola contra, o número de chamadas máis elevado recibiuse no verán, alcanzando o máximo no mes de agosto, con case 7.000 avisos.
Ademais, contactouse por SMS coas persoas que comunicaron o aviso para informalos da resolución e o equipo deixou constancia das intervencións realizadas cun adhesivo que indica a data da visita e informe de que os niños están inactivos.
