O dono dun club de alterne, un cliente dese local e un xinecólogo que tiña unha clínica sen licenza enfróntanse a unha petición de catro anos e medio de cárcere por parte do ministerio fiscal por obrigar supostamente a abortar a unha moza de 18 anos que exercía a prostitución.  O xuízo por esta causa, que procede do Xulgado de Instrución número 1 de Lugo, celebrarase esta semana, entre os días 15 e 16 de outubro, na Audiencia Provincial de Lugo.

Os feitos acontecidos remóntanse a comezos de 2009, cando a moza, que exercía a prostitución no Club Queens mantivo relacións sexuais cun dos clientes do local, que entón rexentaba José Manuel García Adán, e supostamente quedou embarazada del. Segundo o relato do ministerio fiscal, entre febreiro e marzo de 2009, a moza informou ao suposto pai do neno do seu embarazo, así como da súa decisión de seguir adiante coa xestación, pero el tratou de convencela para que abortase.

Como a muller “mostrou reiteradamente a súa negativa” para abortar, o suposto pai púxose en contacto co propietario do Club Queens e pediulle “que o axudase” para forzala a abortar. O fiscal sostén que García Adán, “ prevaliéndose da súa superioridade” sobre a nova e da situación persoal desta, dado que “tiña 18 anos de idade, carecía de familiares en España e de calquera medio de subsistencia diferente á súa actividade no club”, cominouna a abortar.

De feito, segundo o escrito de acusación, díxolle que “se non abortaba non podería traballar no club, que era imposible que puidese ter o fillo e que el mesmo prepararía todo o necesario para que acudise a un xinecólogo amigo” seu. E fíxoo, sostén o fiscal, aínda sabendo “que ela quería continuar co seu embarazo”.

Por mor de “as presións exercidas” por García Adán e coñecidas polo outro acusado, R. L. L. T., xunto coa súa propia “situación persoal” e o “coñecemento” que a moza tiña “de anteriores comportamentos violentos” do dono do Club Queens, a muller accedeu finalmente a acompañalo o 6 de abril de 2009 a un clínica xinecolóxica na cidade de Lugo que carecía de licenza para funcionar como tal.

O xinecólogo acusado, aínda sabendo que o máis probable era que a muller “non consentiría libremente” a interrupción da xestación , practicou o aborto “sen usar anestésico algún”. O fiscal fai constar que García Adán, que a acompañou persoalmente á consulta, sabía que “o local citado non tiña autorización para practicar abortos” e carecía “dos medios sanitarios adecuados”. Ademais, o aborto foi practicado sen “solicitar o consentimento expreso e por escrito da muller gestante”.