A central sindical CIG-Saúde denuncia que o Servizo Galego de Saúde leva anos sen cubrir as prazas médicas en época estival, con independencia da especialidade afectada, por mor das vacacións estivais. Este feito está vencellado aos recortes en sanidade e non a causas organizativas, advirten. Durante este verán será o servizo de odontoloxía o que quedará sen especialistas.
A falla afectará aos diferentes complexos médicos do centro e o sur lucense, na EOXI Lugo – O Cervo – Monforte. Para o usuario da sanidade pública, implicará considerables desprazamentos se o odontólogo ou odontóloga que lle corresponde por área sanitaria atópase de vacacións. Dende a CIG salientan que un veciño de Carballedo tería que desprazarse 40 quilómetros ata Monforte se o profesional de Chantada está de descanso.
Contra estas complicacións, CIG-Saúde demanda a cobertura das odontólogas de atención primaria e dos demais profesionais durante as ausencias motivadas polas vacacións de verán.
