A área sanitaria de Lugo mantén un ritmo sostido de baixada no reconto oficial de casos activos por coronavirus. Este martes 2 de xuño, a Consellería de Sanidade informa de 39 positivos, un menos ca na xornada de onte, e dúas persoas ingresadas.
Un dos pacientes está hospitalizado en planta no HULA, mentres que o outro permanece na Unidade de Coidados Intensivos deste mesmo centro. É unha das tres persoas atendidas na UCI en toda Galicia. Pola súa parte, 37 doentes de COVID-19 reciben o seguimento médico dende os seus domicilios.
Non hai novidades no número de vítimas mortais na provincia, que se mantén en 27, e as altas documentadas sitúanse nas 883.
GALICIA
A Consellería de Sanidade informa tamén da situación a nivel galego, onde se rexistran 707 casos activos (-15) e onde o número de pacientes curados rolda os 10.000. Hai, en total, 30 persoas ingresadas (27 en planta, tres na UCI) e rexistráronse 616 falecementos ata o momento.
