O confinamento ditado á poboación para combater a expansión do COVID-19 evidencia a existencia da ‘brecha tecnolóxica’ que existe entre a contorna urbana e o rural de Galicia, que se ve “penalizado” ao ter peores conexións.
Así o defende o Colexio oficial de Telecomunicacións (Coettga) nun comunicado no que afirma que esta situación, que se pon de manifesto co aumento da demanda de medios telemáticos e de telecomunicacións froito do confinamento da poboación, leva sendo denunciada “durante anos” por veciños e institucións do rural galego.
“A pesar de que houbo un gran avance en moitas zonas, aínda quedan moitos puntos escuros no rural galego”, sinalou o decano do colexio, José M. Martínez. Segundo datos do Ministerio de Economía, máis de 3,2 millóns de habitantes teñen unha conexión a Internet deficiente cunha velocidade menor a 10MB. En días de reclusión nas súas casas nos que, como apuntan, manter contacto social con familiares e achegados “faise máis importante”, denuncian que existen “familias, fogares e pobos” que carecen dunha conexión a Internet que permita, non xa traballar a distancia, senón comunicarse, ben por cuestións loxísticas ou por incapacidade económica.
