A Consellería de Sanidade lanzaba esta mañá unha alerta sanitaria que afectaba aos produtos da empresa lucense Lácteos Casa Macán. “Graves incumprimentos nas condicións estruturais de limpeza e mantemento” nas instalacións provocaron a retirada do mercado de todos os produtos desta compañía, así como a suspensión da súa actividade. Porén, a postura de Casa Macán é de “sorpresa”, pois aseguran que “non hai ningún risco alimentario”.
Sanidade informaba que esta situación se debía a problemas “operacionais ou de hixiene dos procesos”, algo que impide garantir a inocuidade dos ingredientes. Súmanselle a iso “temperaturas inadecuadas”, a falta de protección dos produtos ante focos de contaminación e a “ausencia de garantías de rastrexabilidade de procesos”.
POSTURA DE CASA MACÁN
En cambio, o director xeral de Casa Macán, Eladio Rigueira, mostrou a súa “sorpresa” por que as autoridades sanitarias ordenasen a retirada dos seus produtos, así como a paralización da produción, xa que “non hai ningún risco alimentario”. Rigueira reduce a situación a un problema “de etiquetaxe”.
En declaracións a Europa Press, Rigueira asegura que “non hai ningún produto contaminado” e esta alerta sanitaria “non ten pés nin cabeza”. Sostén que a situación fai un “dano terrible e incalculable” a unha “pequena empresa”. Con todo, recoñece que hai “un problema estrutural”, “pero non para crear unha alarma sanitaria”
Explica que a inspección foi realizada a pasada semana, mentres que a paralización se decretou o luns debido a que “varios lotes foron sen contraetiqueta dos produtos da denominación de orixe”. De feito, sostén que a propia empresa avisou do que considera un “erro humano” á axencia de calidade alimentaria.
Ademais, avanza que poderá recuperar a produción de forma “inmediata” nos próximos días. Tamén agradece a reacción “completamente distinta” do seu “principal cliente” ante esta situación.
PROHIBICIÓN
A prohibición afecta a todos os lotes de produtos desta compañía, como a manteiga cocida de vaca, os queixos das DO Arzúa Ulloa, tetilla, Arzúa Ulloa curado, queixo de barra Costeño e queixo galego en rebandas.
A Consellería de Sanidade recomenda aos cidadáns que teñan estes produtos que non os consuman e que os devolvan aos puntos de compra. Estes lácteos foron distribuídos en Galicia, Cataluña e Castela A Mancha.
